Një raportim i transmetuesit publik gjerman ARD se Turqia është bërë “platforma qendrore e veprimit për grupet islamiste” në Lindjen e Mesme ka sjellë reagimin e menjëhershëm të Ankarasë, që ka kërkuar shpjegime nga Berlini.
Në një dokument konfidencial të siguruar fillimisht nga Associated Press më 16 gusht, qeveria gjermane thotë se Turqia ishte bërë “platforma qendrore e veprimit për grupet islamiste” në Lindjen e Mesme. Ky deklarim, i raportuar nga ARD-ja, mësohet të ketë qenë në një pjesë të rezervuar të një përgjigjeje nga Ministria e Brendshme gjermane për pyetjet nga një parti opozitare.
Një deklaratë e shkruar e Ministrisë së Jashtme turke thotë se pretendimet në fjalë janë “një tregues i ri i mentalitetit të shtrembëruar që po përpiqet ta dobësojë vendin tonë me anë të [sulmimit] të presidentit dhe qeverisë sonë”.
“Si një vend që lufton sinqerisht kundër të gjithë llojeve të terrorit, pa marrë parasysh cilat janë rrënjët e tyre, Turqia pret nga partnerët dhe aleatët e tjerë të veprojnë në të njëjtën mënyrë,” vijon deklarata e Ministrisë së Jashtme turke.
Ministria e Brendshme gjermane u përgjigj po ashtu përmes një deklarate, ku thuhej se dokumenti është i klasifikuar si konfidencial, prandaj nuk mund të komentohet publikisht mbi përmbajtjen.
Kurse zëdhënësi i kësaj ministrie, Johannes Dimroth, bëri të ditur se raporti ishte nënshkruar nga një zëvendësministër, duke shtuar, “Kur njerëzit punojnë, mund të ngjasin gabime. Ne jemi thellësisht të bindur se Turqia është partneri më i rëndësishëm në luftën kundër grupit të ashtuquajtur Shteti Islamik.”
Përndryshe, zëdhënësja e Ministrisë së Jashtme gjermane, Sawsan Chebli, do të jepte këtë përgjigje, “Ne nuk ndajmë vlerësimin si një tërë për çfarë është publikuar në media.“
Kjo është përplasja e fundit mes dy vendeve, marrëdhëniet mes të cilave kanë njohur një ftohje të vazhdueshme në muajt e fundit. /tesheshi.com/
