Turqia ia lë çështjen “Khashoggi” Arabisë Saudite

Gjyqësori turk vendosi të enjten t’i dorëzojë Arabisë Saudite gjyqin e vrasësve të gazetarit Jamal Khashoggi, i cili u vra në vitin 2018 në konsullatën saudite në Stamboll.

“Ne kemi vendosur t’ia lëmë gjyqin Arabisë Saudite,” tha një gjykatës në një gjykatë në Stamboll, ku 26 të paditur sauditë janë në gjyq në mungesë që nga korriku 2020.

Sipas AFP, një rezultat i tillë pritej sepse ministri turk i drejtësisë Bekir Bozdag dha një opinion pozitiv më parë.

Vrasja e gazetarit disident Khashoggi, një shtetas saudit i cili hyri në konsullatën e vendit të tij për të kërkuar lejen e nevojshme për t’u martuar, por u vra dhe u copëtua atje, tensionoi marrëdhëniet midis dy fuqive rajonale për vite me rradhë.

Përballë krizës ekonomike, Turqia tani po përpiqet të pajtohet me monarkinë e pasur të Arabisë Saudite, një eksportues i madh i naftës, sipas AFP.

Avokati bëri ankesë

“Një vendim i tillë është kundër ligjit” dhe “shkel sovranitetin turk”, tha Gokmen Baspinar, avokati që përfaqëson të fejuarën e gazetarit të vrarë.

“Nuk do të ketë asnjë gjyq kundër autorëve në Arabinë Saudite, sepse autoritetet atje tashmë e kanë mbyllur çështjen dhe kanë vendosur të lirojnë një numër të dyshuarish,” tha ai, duke apeluar ë Gjykatën Administrative të Ankarasë kundër vendimit të Ministrisë së Drejtësisë.

Hatice Cengiz, e fejuara e gazetarit të vrarë që e priste para konsullatës kur ai shkoi për të kërkuar dokumente, shkroi më herët në Twitter se vendimi për pushimin e gjyqit e çoi prokurorin tek autoritetet saudite.

Edhe para se të merrej vendimi, Reporterët pa Kufij në Stamboll e quajtën kërkesën “lajm të tmerrshëm”, duke theksuar se ishte përgjigja e Turqisë ndaj një kërkese të bërë nga Arabia Saudite “më 13 mars”. /tesheshi.com/