Anëtari i NATO-s, Turqia ka propozuar kryerjen e një evakuimi detar të luftëtarëve të plagosur të fshehur në një fabrikë çeliku në qytetin jugor të Ukrainës, Mariupol, tha të shtunën një zëdhënës i presidentit Erdogan.
Në një intervistë për Reuters, Ibrahim Kalin tha se dy javë më parë në Kiev ai diskutoi personalisht propozimin me presidentin ukrainas Volodymyr Zelensky dhe se ai mbetet “në tavolinë” edhe pse Moska nuk ishte dakord me të.
Sipas planit të propozuar, njerëzit e evakuuar nga uzina e madhe e çelikut Azovstal do të dërgoheshin me rrugë tokësore në portin e Berdyanskut, i cili, si Mariupol, është në Detin Azov, dhe një anije turke do t’i transportonte ata përtej Detit të Zi, për në Stamboll, tha ai.
“Nëse mund të bëhet kështu, do të jemi të lumtur ta bëjmë. Ne jemi gati. Në fakt, anija jonë është gati të niset dhe të sjellë ushtarë të plagosur dhe civilë të tjerë në Turqi”, tha Kalin, i cili është edhe këshilltar i Erdoganit.
Ukraina dhe Rusia nuk komentuan menjëherë mundësinë e evakuimit nga deti.
Pas javësh të rrethimit dhe bombardimeve ruse, Mariupol është në duart e rusëve, por qindra luftëtarë ukrainas po mbahen nën zjarr të fortë në fabrikën e çelikut.
Një numër i civilëve që u strehuan në objekt u evakuuan këtë muaj me ndihmën e Komitetit Ndërkombëtar të Kryqit të Kuq dhe Kombeve të Bashkuara.
Propozimi i Turqisë përfshin dhe evakuimin e civilëve që janë ende atje.
Kujtojmë se ushtarët ukrainas, si dhe familjarë të tyre, i janë drejtuar me lutje Turqisë dhe personalisht Erdoganit si njeriu që mund t’i nxjerr nga rrethimi rus, duke qenë brenda katakombeve të Azovstalit. /tesheshi.com/
