Turqia ka filluar ndërtimin e një “muri sigurie” përgjatë kufirit të saj me Iranin, qëllimi i të cilit është të ndalojë separatistët kurdë, thanë sot zyrtarët rajonale.
Në fotografitë e publikuara në faqen e internetit të guvernatorit të provincës lindore të Agrit, shihen kamionë duke transportuar blloqe të mëdha betoni drejt kufirit, citon AFP.
Autoritetet turke kanë njoftuar për ndërtimin e barrierës 144 kilometra të gjatë, si një mënyrë për të bllokuar lëvizjen ndërkufitare të anëtarëve të Partisë së Punëtorëve të Kurdistanit (PKK), e cila është e ndaluar në Turqi.
I gjithë kufiri turko-iranian, është i gjatë rreth 500 kilometra, vë në dukje agjencia franceze.
PKK-ja kurde, e cila ka udhëhequr një kryengritje brenda Turqisë nga viti 1980, është shpallur grup terrorist nga Ankaraja dhe aleatët e saj perëndimorë.
Me qëllim të forcimit të sigurisë, Turqia ka filluar të ndërtojë një mur të ngjashëm edhe në kufirin sirian dy vjet më parë, në mënyrë që të parandalojë anëtarët e grupit të armatosur të Shtetit Islamik të Irakut dhe Levant (ISIL) të kalojnë me lehtësi kufirin mes dy vendeve.
Ministri turk i Mbrojtjes Fikri Isik tha në qershor se 690 nga 828 kilometra të planifikuara të murit në kufirin me Sirinë janë përfunduar dhe pas përfundimit, do të futen masa shtesë të sigurisë kufitare. /tesheshi.com/
