Turqia e sheh me shpresë presidencën e Trump-it për marrëdhëniet dypalëshe

Entuziazmi në qarqet qeverisëse turke nuk ka munguar që prej zgjedhjes së Donald Trump-it si presidenti i 45-të i SHBA-së. Në Turqi shpresohet fort që t’u jepet fund mospajtimeve në mendim e veprim me administratën amerikane, posaçërisht të dukshme gjatë periudhës së fundit të presidencës së Obama-s.

Kryeministri turk, Binali Jëlldërëm përsëriti dje, para se Trump të merrte detyrën, kërkesat kyçe të Ankarasë për sjelljen e marrëdhënieve dypalëshe në shinat e duhura.

“Ne i urojmë suksese Trump-it. Ka pritshmëri të madhe në shumë pjesë të botës nga administrata e re. Vendet udhëheqëse të botës, SHBA-ja dhe Rusia, kanë një përgjegjësi domethënëse për sigurinë, qetësinë dhe sigurinë globale. Ne presim që ato t’u japin më shumë mbështetje përpjekjeve të Turqisë për ta bërë të përhershme paqen në rajon,” u deklaroi gazetarëve Jëlldërëm një ditë më parë.

Ekstradimi i Fethullah Gylenit, njeriut përgjegjës për grushtin e dështuar të shtetit të 15 korrikut, është ajo çka pret fillimisht Ankaraja. Siç pret dhe ndërprerjen e mbështetjes amerikane për PYD-në e YPG-në në Siri, të cilësuara si organizata terroriste nga Turqia.

“Shpresojmë se kësaj situate do t’i jepet fund,” do të shtonte kryeministri turk.

Zëdhënësi i presidentit turk, ka folur po ashtu për një kontakt të shpejtë me administratën e Trump-it. Ai ka bërë me dije se do të ketë komunikim gjatë fundjavës me administratën amerikane, për t’u përqendruar, sipas tij, te çështje të tila si Siria dhe takimi i ardhshëm në Astana.

“Çfarë unë shoh është se administrata e Trump-it ka një këndvështrim që i merr në konsideratë ndjeshmëritë e Turqisë në lidhje me rajonin,” u shpreh sot Ibrahim Kallën, shpresëplot për marrëdhënie të reja me administratën e Trump-it.

Ankaraja pret një vizitë të Trump-it, bëri të ditur Kallën, e kjo pas një bisede telefonike mes tij dhe presidentit Erdogan. /tesheshi.com/