Turqia e pakënaqur me ofertën e BE-së: e papranueshme

Një draft, e jo përfundimtar, e ka cilësuar planin e veprimit të BE-së ministri i Jashtëm turk, Feridun Sinirliogllu.

Ai është treguar i prerë të premten, duke u deklaruar gazetarëve, “Ka një paketë financiare të propozuar nga BE-ja, dhe ne u thamë atyre se ajo është e papranueshme.”

Turqia dhe Bashkimi Europian ka rënë dakort në parim dy ditë më parë për një plan veprimi për frenimin e vërshimit të refugjatëve në vendet europiane, por mbi të cilin po punohet ende.

Një ndihmë financiare, përshpejtimi i procesit të liberalizmit të vizave dhe një rinisje e bisedimeve për pranim në BE janë mes gjërave që i ofrohen Turqisë në shkëmbim të mbajtjes së refugjatëve në territorin e saj.

Ministri i Jashtëm e quan të pakuptimtë shumën financiare të menduar për t’iu dhënë Turqisë. “Ne kemi shpenzuar 8 miliardë dollarë për refugjatët, dhe prodhimi ynë kombëtar i përgjithshëm është rreth 800 miliardë dollarë. 18 trilionë dollarë është prodhimi i tyre i përgjithshëm. Tre miliardë euro përkundër 18 trilionë dollarëve janë komike.”

Sinirliogllu nuk pranoi të shpjegojë se ç’shumë kërkon Ankaraja, veçse e bëri të qartë se, “Nëse BE-ja jep 3 miliardë euro në fazën fillestare, kjo do të kishte kuptim.”

Zyrtari më i lartë i politikës së jashtme turke do të shprehte dhe pakënaqësinë për vëmendjen ndaj Turqisë veç në kohë krize: “Turqia nuk është një vend që duhet kujtuar veç në kohë krize, e nuk është një vend me të cilin mund të bashkëpunohet vetëm për arsye taktike.”

Turqia është pritësja kryesore e të larguarve prej luftës në Siri, ndërsa rreth 2 milionë prej tyre janë të sistemuar tashmë aty. Ndërkaq, një pjesë e refugjatëve të luftës kanë zgjedhur të vijojnë rrugën drejt vendeve të BE-së.

Kjo është dhe tema kryesore e bisedimeve që kancelarja gjermane, Angela Merkel, do të zhvillojë këtë të dielë me shtetarët turq në Ankara. /tesheshi.com/