Anulimi i takimeve të dy ministrave të qeverisë turke me komunitetin turk në Gjermani në kuadër të fushatës për referendumin mbi ndryshimet kushtetuese vazhdon të ketë jehonë e të përcillet me reagime të forta në Turqi.
Pas thirrjes së ambasadorit gjerman në Ankara në Ministrinë e Jashtme turke dhe pas dorëzimit të një note proteste, si dhe pasi ministri turk i Drejtësisë anuloi në kundërpërgjigje takimin me homologun gjerman, ka qenë radha e Mevlüt Çavuşoğlu-së, shefit të diplomacisë turke, të reagojë ndaj aktit të Gjermanisë.
Anulimi i takimeve të shtetarëve turq me komunitetin e madh të qytetarëve të vendit euroaziatik është një fenomen i përsëritur, në një kohë që Gjermania u ka hapur dyert gjithfarë njerëzve të akuzuar për terrorizëm e vepra penale në Turqi.
Ministri i Jashtëm turk u ka deklaruar gazetarëve sot se Gjermani duhet të mësojë se si të sillet me Turqinë nëse do që t’i ruajë lidhjet reciproke.
“Nëse doni t’i ruani lidhjet me ne, jeni të detyruar të mësoni se si të silleni.”
Ky ka qenë shpjegimi që ka dhënë Mevlüt Çavuşoğlu për anulimin e takimeve të ministrave turq nga autoritetet gjermane: “Nuk duan që Turqia të bëjë fushatë këtu [në Gjermani], sepse punojnë për “jo”-në. Duan t’i presin rrugën Turqisë së fuqishme.”
“Kjo është bërë një praktikë sistematike e shtetit paralel gjerman. Presioni sistematik mbi shoqërinë turke [në Gjermani] nuk e shkurajon atë. Ju nuk mund ta arrini këtë,” ka shtuar Çavuşoğlu para gazetarëve.
Akoma më i ashpër ka qenë ministri turk i Drejtësisë, Bekir Bozdağ, teksa ka thënë se Gjermania është kthyer në strehë të terroristëve e se ndalimi i takimeve me komunitetin turk është diçka tipike fashiste. /tesheshi.com/
