Zëdhënësi i presidentit turk, Ibrahim Kallën, ka dalë dje para gazetarëve, ku ka shpjeguar mes të tjerash se në çfarë pike gjenden bisedimet me autoritetet izraelite për normalizimin e marrëdhënieve.
Turqia dhe Izraeli po kryejnë bisedime për normalizimin e marrëdhënieve pas më shumë se pesë vitesh pasi trupat izraelite sulmuan në ujërat ndërkombëtare një flotilje anijesh me ndihma për në Gaza, duke vrarë 10 persona e duke plagosur shumë të tjerë në bordin e Mavi Marmara-së.
Pa përmbushje të tre kushteve, ka theksuar Kallëni, nuk do të ketë normalizim të marrëdhënieve.
Kushti i parë, ndjesa e kërkuar Turqisë është plotësuar tashmë, ndërsa po diskutohet për dy të tjerat. “Ka patur përparim për kushtin e dytë, atë të kompensimit, por nuk kemi arritur një pikë ku mund ta shkruajmë me bojë atë,” ka sqaruar zëdhënësi i Erdoganit. Siç mësohet, Izraeli ka rënë dakort së fundi që ta çojë shumën e dëmshpërblimit për viktimat në 20 milionë dollarë.
Një kusht i tretë është i panegociueshëm, e pikërisht çështja e bllokadës ndaj Gazës. “Ka një kusht të tretë. Heqja apo lehtësimi i bllokadës ndaj Gazës, pra, për të dërguar ndihma humanitare në Gaza,” do të vijonte Ibrahim Kallën.
“Turqia do të qëndrojë në krah të Gazës derisa kushtet tona të plotësohen. Qëndrimi ynë mbi këtë çështje nuk ka ndryshuar kurrë. Turqia ka për të vazhduar ta luajë rolin e saj gjersa të arrihet një zgjidhje me dy shtete, dhe populli palestinez të ketë shtetin e tij. Nuk mund të ketë paqe të përhershme në rajon derisa të zgjidhet problemi palestinez.” /tesheshi.com/
