Kryeministri turk dhe kreu i partisë për Drejtësi dhe Zhvillim, Ahmet Davutoglu do të kthejë tek presidenti mandatin për formimin e qeverisë së re turke, pas dështimit të negociatave me partite parlamentare.
Sipas zyrës së Davutoglu, ky i fundit do të takohet me presidentin Erdogan në Ankara për të dorëzuar mandatin të cilin e mori më 9 Korrik. Që prej asaj kohe, katër partitë e përfaqësuara në parlament, AK, partia Popullore Republikane, Partia e lëvizjes Nacionaliste dhe partia Popullore Demokratike kanë qenë në bisedime për të formuar një koalicion qeverisës.
Bisedimet nisën së pari me partinë Republikane, por që nuk arritën në kompromis pas një muaji negociatash. Me nacionalistët, mjaftuan dy orë bisedime për të konkluduar se nuk kishte marrëveshje.
Kur afati i fundit i formimit të Qeverisë po afron, më 23 Gusht, presidenti Erdogan ose parlamenti mund të vendosë për mbajtjen e zgjedhjeve të reja. Nëse presidenti e merr këtë vendim, atëherë zgjedhjet mund të mbahen të dielën e parë pas një periudhe 90 ditore nga 23 Gushti.
Turqia duket tashmë, se po i drejtohet një raundi i ri zgjedhor pas atyre të 7 Korrikut në të cilat asnjë parti nuk arriti mazhorancën e thjeshtë në parlament.
Zgjedhjet e reja mund të mbahen në fund të nëntorit, ose dhe më herët nëse këtë e vendosin autoritetet zgjedhore. Nëse caktohet data e zgjedhjeve, në qeveri e përkohshme do të ngrihet për të drejtuar vendin. /tesheshi.com/
