Mjetet turke të informimit, por edhe ato izraelite, njoftojnë për arritjen e një marrëveshjeje për normalizimin e marrëdhënieve midis dy vendeve.
Delegacionet turke dhe izraelite u takuan në fundjavë në Romë për ta përmbyllur marrëveshjen e pajtimit. Një marrëveshje që vjen gjashtë vite pas sulmit izraelit që la të vrarë dhjetë aktivistë turq në anijen “Mavi Marmara,” pjesë e një flotilje që po përpiqej të thyente bllokadën ndaj Gazës.
Gjashtë vite përpjekje diplomatike kanë rezultuar të suksesshme për diplomacinë turke, që ka arritur të sigurojë një kërkim faljeje prej kryeministrit izraelit, Netanyahu-t, një dëmshpërblim për viktimat e sulmit izraelit, si dhe heqjen e bllokadës së Gazës.
Daily Sabah njofton se një zyrtar i lartë turk ka raportuar këtë të hënë për arritjen e marrëveshjes në Romë për normalizimin e marrëdhënieve dypalëshe me Izraelin.
Marrëveshja parashikon që Turqia mund të dërgojë ndihma humanitare në Gaza, si dhe produkte joushtarake, e po ashtu të bëjë investime infrastrukturore. Turqia do të përfundojë ndërtimin e një spitali me 200 shtretër në Gaza, përpos godinave të reja të banimit. Përmirësimi i furnizimit të palestinezëve në Gaza me ujë e energji elektrike është parashikuar po ashtu, me ndërtimin e centraleve të reja elektrike.
Kjo marrëveshje do t’i mundësojë Turqisë nisjen e një sërë projektesh në Bregun Perëndimor, duke përfshirë zonën industriale të Xheninit.
Zyrtari i lartë turk ka nënvizuar se në marrëveshje nuk ka asnjë referencë për Hamasin.
“Një hap të rëndësishëm” e ka quajtur kryeministri izraelit, Benjamin Netanyahu, marrëveshjen pas takimit në Romë me sekretarin amerikan të Shtetit. John Kerry do ta çmonte po ashtu marrëveshjen, duke thënë, “Ky është hapi që do të donim të shihnim.”
Presidenti i Autoritetit Palestinez, Mahmoud Abbas, është njoftuar për marrëveshjen këtë të hënë pas një bisede telefonike me presidentin turk. Burime të presidencës turke kanë deklaruar se Abbas-i e ka mirëpritur marrëveshjen. /tesheshi.com/
