Turqia do të dërgojë një anije tjetër shpimi në Detin e Zi, tha ministri i Energjisë Fatih Donmez sot, disa javë pasi Ankaraja njoftoi zbulimin e saj më të madh të gazit natyror në zonë ndonjëherë.
“Anija jonë e shpimit Kanuni, puna përgatitore e së cilës vazhdon, do të fillojë shpimet në Detin e Zi,” shkroi ministri në Twitter.
Donmez shtoi se Kanuni do të mbështesë anijen e shpimit Fatih, e cila gjeti 320 miliardë metra kub gaz natyror rreth 100 milje detare në veri të bregdetit turk, raporton Reuters.
Nuk dihet nëse Kanuni do të punojë në të njëjtën fushë me Fatih. Kanuni aktualisht ndodhet përgjatë bregdetit të provincës jugore të Antalias, sipas të dhënave për gjurmimin e anijeve.
Donmez tha muajin e kaluar se të dhënat sugjeronin se do të gjendej më shumë gaz natyror ndërsa shpimet vazhdonin më thellë nën shtratin e detit. Një zyrtar i lartë i Ministrisë së Energjisë tha këtë javë se Turqia shpreson të njoftojë zbulimin e ri në tetor.
Turqia po kryen gjithashtu operacione në Mesdhe, duke çuar në konflikte me Greqinë dhe Qipron për pronësinë e burimeve të mundshme të hidrokarbureve në zonë. /tesheshi.com/
