Negociatat midis zyrtarëve turq dhe grekë në selinë e NATO-s se si të shmanget përshkallëzimi ushtarak në Mesdheun lindor janë shtyrë për të enjten, thanë burimet e Ministrisë Turke të Mbrojtjes.
Delegacionet ushtarake të dy vendeve anëtare të NATO-s supozohej të flisnin të martën në selinë e NATO-s në Bruksel, por burimet turke thonë se takimi u shty për të enjten, raporton Reuters.
Ministri i Jashtëm turk Mevlüt Cavusoglu ka akuzuar Greqinë për braktisjen e një marrëveshje për të zhvilluar bisedime teknike, të cilat nuk do të merren me mosmarrëveshjen themelore territoriale, por mund të diskutojnë krijimin e një linje të nxehtë midis dy ushtrive dhe përdorimin e vazhdueshëm të shenjave të thirrjeve detare.
“Nëse Greqia beson në vetvete, nëse ka guximin dhe beson në tezën e saj, atëherë le të vijë dhe të ulet në tryezë,” tha Çavusoglu në një konferencë shtypi në Ankara.
Tensione dhe provokime të shpeshta
Athina thotë se çdo bisedim kërkon largimin e anijeve turke nga ujërat e diskutueshme dhe një burim grek pa emër i tha Reuters se prania e atyre anijeve çon në tensione dhe “përqendrim të një numri të madh të forcave ushtarake në zonë”.
Presidentja greke Katerina Sakellaropoulou tha se vendi dëshiron dialog, por jo “nën kërcënime, shantazhe dhe provokime”.
Greqia po kërkon gjithashtu që Bashkimi Evropian të vendosë sanksione ndaj Turqisë.
Bisedimet, të njoftuara javën e kaluar nga Sekretari i Përgjithshëm i NATO-s Jens Stoltenberg, kanë për qëllim parandalimin e një përshkallëzimi, i cili mund të rezultojë nga incidente të tilla si përplasja e muajit të kaluar midis anijeve luftarake greke dhe turke. /tesheshi.com/
