Ka marrë përmasa më tragjike sulmi i mbrëmshëm terrorist në Gaziantep të Turqisë, ku një shpërthim në një ceremoni dasme e ktheu gëzimin në mort.
Një deklaratë e shkruar e prefekturës së Gaziantepit njofton se numri i të vrarëve ka arritur në 50, ndryshe nga ç’ishte raportuar në orët e para pas sulmit.
“Numri i të vrarëve në sulmin e kryer mbrëmjen e së shtunës së 20 gushtit në Gaziantep ka shkuar në 50,” thuhet në deklaratën e prefekturës.
Më pas deklarata vijon me ngushëllimet për të vrarët, me urimin për shërim të shpejtë të të plagosurve, e me dënimin e sulmit terrorist.
Më herët qe raportuar për 30 të vrarë e 94 të plagosur nga shpërthimi. Të dhënat paraprake flasin për një sulm kamikaz, të kryer nga ISIS-i.
Ndërkohë, kryetarja e bashkisë së Gaziantepit, Fatma Shahin, një ish-ministre në qeveritë e mëhershme të AKP-së, i ka paralajmëruar qytetarët të mos bien pre e provokimeve.
Një valë e tillë aktesh terroriste qe paralajmëruar me të dështuar puçi ushtarak i 15 korrikut, si një përpjekje për të nxitur trazira e për ta shtënë Turqinë në konflikt civil. “Nuk kanë për t’ia dalë,” kanë qenë fjalët e presidentit Erdogan menjëherë pas sulmit të mbrëmshëm terrorist. /tesheshi.com/
