Njëmbëdhjetë ligjvënës të partisë kurde HDP, Partisë Demokratike Popullore, janë ndaluar në Turqi sepse nuk i janë përgjigjur thirrjes për të dëshmuar në një hetim kundër terrorizmit. Mes të ndaluarve janë dy bashkudhëheqësit e partisë, si dhe drejtuesi i grupit parlamentar.
Parlamentarët e ndaluar përballen me ndjekje ligjore në kuadër të ligjeve të antiterrorizmit, pasi imuniteti parlamentar është hequr për deputetët më herët gjatë këtij viti. Ndryshe nga deputetët e partive të tjera, ligjvënësit e HDP-së nuk kanë pranuar të dëshmojnë për një hetim të caktuar në lidhje me terrorizmin.
Pas kësaj, në mëngjesin e sotëm ka ndodhur një shpërthim në një lagje të Dijarbakërit, prej së cilit ka humbur jetën një person e janë plagosur tridhjetë të tjerë.
Shpërthimi u krye nga PKK-ja, organizata terroriste kurde. Mjetet turke të informimit flasin për një makinë të mbushur me lëndë shpërthyese të hedhur në erë pranë një godine policore në lagjen Ballar (Bağlar) të Dijarbakërit.
Nga shpërthimi kanë pësuar dëmtime dhe banesat e makinat afër vendit të ngjarjes. /tesheshi.com/
