Këshilltari i presidentit ukrainas dhe kreu i delegacionit negociues ukrainas, Mikhail Podolyak është optimist kur bëhet fjalë për negociatat midis Ukrainës dhe Rusisë dhe pretendon se një armëpushim mund të arrihet në të ardhmen e afërt.
“Unë besoj se procesi i negociatave do të zhvillojë formën optimale të marrëveshjes. Ne, në parim, do të arrijmë një armëpushim dhe mendoj, në të ardhmen e afërt,” tha Podolyak në një intervistë për AA.
Ai tha se autoritetet ruse duhet të njohin dështimin e tyre në Ukrainë dhe të kuptojnë se lufta duhet të përfundojë me shpalljen e armëpushimit dhe vendosjen e paqes.
“Pasi Rusia të ketë vlerësuar objektivisht humbjet e saj, të dyja palët mund të kenë një qasje më pragmatike ndaj negociatave”, shtoi Podolyak.
Megjithatë, Podolyak tha se ka ende disa pengesa në procesin e negociatave, të tilla si kërkesat e paarsyeshme ruse që janë të papranueshme për Ukrainën.
Duke vënë në dukje se qindra mijëra ukrainas po mbrojnë vendin e tyre dhe po vdesin në fushën e betejës, Podolyak tha se Ukraina definitivisht nuk do të pranojë ultimatumin fillestar të vendosur nga Rusia.
Podolyak pretendon se Rusia po përpiqet të detyrojë Ukrainën të pranojë ultimatumin duke sulmuar civilët.
“Taktika e tyre kryesore në ditët e para të luftës ishte të shkatërronin infrastrukturën ushtarake, aeroportet, bazat ushtarake dhe të përpiqeshin të hynin në Kiev për të shkatërruar lidershipin politik dhe për të dobësuar në mënyrë dramatike vendin. Tani taktika ka ndryshuar.
Ata rrethojnë qytetet e mëdha, qytezat, dhe kështu përpiqen të krijojnë shumë qendra lokale të krizave humanitare në të gjithë vendin për të shkaktuar sa më shumë panik te njerëzit”, tha Podolyak.
Duke theksuar se Rusia po përpiqet gjithashtu të marrë kontrollin e objekteve të infrastrukturës kritike në Ukrainë, si termocentralet bërthamore, Podolyak tha se qëllimi i Moskës mund të jetë të shkaktojë disa dëme, të cilat do të kenë ndikim jo vetëm lokal, por edhe global.
Podolyak tha më tej se forcat ruse nuk do të lejohen të hyjnë në Kiev.
“Ata nuk do të mund të hyjnë në Kiev me operacion tokësor. Mobilizimi në Ukrainë është në nivelin më të lartë. Njerëzit duan të mbrojnë vendin e tyre dhe do ta bëjnë këtë”, tha ai.
Podolyak përshëndeti angazhimin e bashkësisë ndërkombëtare në përpjekjen për të gjetur një zgjidhje diplomatike dhe vlerësoi rolin aktiv të Turqisë në këtë drejtim.
“Ne jemi shumë të kënaqur që kemi partnerë ndërkombëtarë që përpiqen të marrin përsipër misionin e ndërmjetësimit dhe Turqia po merr një rol aktiv në këtë drejtim,” tha ai.
Një takim trepalësh i ministrave të jashtëm të Turqisë, Ukrainës dhe Rusisë u mbajt në Antalia me ndërmjetësimin e Turqisë dhe Podolyak tha se ishte një mundësi për t’i paraqitur një pamje më objektive palës ruse, e cila mund të ndihmojë në lëvizjen e procesit të negociatave në një drejtim më konkret. /tesheshi.com/
