Turqit dhe armenët kanë jetuar së bashku për shekuj, tha presidenti turk Rexhep Tajip Erdogan në një mesazh të dielën drejtuar kreut të Patriarkanës Armene në Stamboll, Sahak Mashalian, transmeton AA.
Në mesazhin e tij, ai iu drejtua komunitetit turko-armen të mbledhur në Patriarkanën Armene të Stambollit për të nderuar armenët osmanë që u vranë në “kushtet e vështira” të Luftës së Parë Botërore.
“Edhe një herë kujtoj me respekt armenët e ndjerë osmanë dhe shpreh ngushëllimet e mia të sinqerta për të afërmit e tyre”, tha Erdogan.
Duke përsëritur se vitet e fundit të Perandorisë Osmane, që përkoi me luftën, ishin një “periudhë shumë e dhimbshme” për miliona osmanë, Erdogan tha se ishte një detyrë humanitare të kuptohen dhe të ndajmë këto dhimbje të përbashkëta pa diskriminim të bazuar në fe, etni apo kulturë.
“Për ne, që kemi ndarë gëzimin dhe pikëllimin me njëri-tjetrin për shekuj, është e rëndësishme të shërojmë plagët e së kaluarës dhe të forcojmë më tej lidhjet tona shoqërore,” tha Erdogan, duke shtuar se në vend që të rrisim dhimbjen, “ne duhet të ndërtojmë të ardhmen së bashku duke marrë frymëzim nga një unitet i rrënjosur thellë që daton pothuajse një mijë vjet më parë”.
Duke komentuar përpjekjet e vazhdueshme për normalizimin e marrëdhënieve midis Turqisë dhe Armenisë, ai vlerësoi mbështetjen e komunitetit armen në Turqi për procesin.
“Pres që ju të jepni një kontribut të fuqishëm për të shfrytëzuar këtë mundësi historike që është shfaqur pas kaq shumë vitesh në emër të paqes dhe stabilitetit të qëndrueshëm në rajonin tonë”, shtoi presidenti turk.
Ai është i bindur se, siç tha, se “Turqia do të bëjë të gjitha përpjekjet për të siguruar që qytetarët tanë armenë, të cilët kanë lënë gjurmë të pashlyeshme në jetën tonë kulturore dhe shoqërore gjatë shekujve të bashkëjetesës sonë në këtë zonë, të bëjnë një jetë paqeje, besimi dhe sigurie…”
Në ngjarjet e vitit 1915, Turqia argumenton se vuajtjet e armenëve në Anadollin lindor ndodhën kur disa prej tyre morën anën e pushtimit rus dhe kryengritjes kundër forcave osmane. Lëvizja e armenëve nga njëra anë në tjetrën rezultoi në viktima të shumta.
Turqia pretendon se kjo është një tragjedi në të cilën të gjitha palët kanë pësuar viktima të mëdha, por kundërshton pretendimet e qarqeve radikale armene që duan t’i paraqesin këto ngjarje si “gjenocid”.
Ankaraja zyrtare po propozon me këmbëngulje formimin e një komisioni të përbashkët të përbërë nga historianë nga Turqia, Armenia dhe ekspertë ndërkombëtarë. Komisioni do të ketë për detyrë të hedhë dritë mbi ngjarjet e asaj periudhe. /tesheshi.com/
