Flamuj shqiptarë të reckosur valëviten në sheshin “Adem Jashari” në lagjen e boshnjakëve në veri të Mitrovicës, gjë e cila po përjetohet mjaft rëndë nga banorët kosovarë.
“Nuk po mundem t’i shikoj këta flamuj kështu të reckosur, e më duhet me ulë kokën kur kaloj andej pari”, ka thënë Brahim Sulejmani, banor i Mitrovicës.
Sipas tij, ky është turpi i shqiptarëve dhe i mitrovicasve. “Më mirë mos me i vendos hiç këta flamuj se me i lënë e me ardh në këtë gjendje, aq më keq që poshtë tyre në rreth shkruan ‘Sheshi Adem Jashari’. Nuk dua të komentoj më shumë rreth këtij turpi”, ka thënë Sylejmani.
Në anën tjetër, përfaqësuesit shqiptarë të Lagjes së Boshnjakëve në veri të Mitrovicës nuk kanë dashur që të komentojnë mbi gjendjen e mjerueshme të flamujve kombëtar, por kanë theksuar se shumë shpejt këta flamuj do të largohen dhe aty do të vendosen flamuj të rinj.
Por deri sa ato të zëvendësohen, do vijojnë të valëviten ashtu, të reckosur. /tesheshi.com/
