Ka filluar dje në Shtetet e Bashkuara të Amerikës turneu US Open, një prej katër turneve grand slam. Një turne që do të zhvillohet përgjatë dy javëve, me ditën e tij të fundit më 11 shtator.
Në orët e para të kësaj të marte, kampioni në fuqi, dhe numri një i botës, Novak Djokovic, ka eliminuar polakun Janowicz, në raundin e parë të turneut. Ka qenë një takim disi problematik për serbin, që ka patur shqetësime me kyçin e dorës së djathtë.
Takimi ka përfunduar 3-1, me setet të fituar nga Djokovic 6-3, 5-7, 6-2, 6-1.
Kanadezi Milos Raonic, i pesti në renditje, ka mposhtur 3-0 gjermanin Dustin Brown. Përballja nuk ka qenë aq e thjeshtë, ndërsa setet janë fituar ngushtësisht, 7-5, 6-3 dhe 6-4.
Rafael Nadal, i cili mungoi në dy turnetë parandës të Grand Slam-it për shkak të problemeve shëndetësore, e ka kaluar lehtësisht ndeshjen e parë, duke fituar 3-0 ndaj uzbekistanasit Denis Istomin.
Te femrat, Angelique Kerber kryesonte ndaj sllovenes Hercog kur kjo e fundit u tërhoq.
Spanjollja Muguruza ka fituar 2-1 ndaj belges Mertens, duke kaluar në raundin e dytë të turneut. /tesheshi.com/
