Numri tre i botës në tenisin e meshkujve do të jetë një prej të munguarve të mëdhenj në Grand Slam-in që do të zhvillohet në Francë në dy javët e ardhshme.
Roger Federer nuk do të jetë në French Open, pasi ka marrë vendimin për t’u tërhequr si pasojë e një dëmtimi në shpinë, të cilin nuk arriti ta linte pas.
Zviceriani ka filluar të ndjejë peshën e moshës, duke pësuar lëndime të njëpasnjëshme. Ai nuk luajti në turneun e Madridit në fillim të majit, për t’u eliminuar në raundin e tretë të turneut pasardhës, Italian Open.
Federer e ka fituar vetëm njëherë turneun e Roland Garros-it, në vitin 2009, por ka dominuar për një kohë të gjatë në tenisin botëror, duke qenë numri një.
“Jam duke bërë progres të qëndrueshëm, por nuk jam ende në 100%. Mund të ndërmerrja një rrezik të panevojshëm duke luajtur në këtë aktivitet përpara se të jem gati,” ka deklaruar tenisti.
Kjo është hera e parë që Roger Federer mungon në një turne Grand Slam pas vitit 2000. /tesheshi.com/
