Numri i shtetasve shqiptarë dhe të huaj që kanë hyrë në territorin shqiptar gjatë muajit korrik 2017 është 1.379.302. Kjo shifër është 2.8 për qind më e lartë se i njëjti muaj i një viti më parë.
Në raportin e INSTAT thuhet se numri i shtetasve të huaj të hyrë në Shqipëri është 864.023, ose 0.1 për qind më pak se korriku i 2016-ës.
Sipas tij, numri i shtetasve të huaj të hyrë në Shqipëri në shtatë mujorin e 2017 është 5.199.145, duke u rritur me 5,6 %, në krahasim me të njëjtën periudhë të vitit 2016.
Në korrik 2017, ndër dhjetë vendet që kanë hyrjet më të larta të shtetasve në Shqipëri, rritjen më të lartë e ka Zvicra me 52,3 %, ndërsa uljen më të madhe e kanë shtetasit nga Kosova me 33,2 %.
Në shtatë mujorin e 2017, ndër dhjetë vendet që kanë hyrjet më të larta të shtetasve në Shqipëri, Polonia ka rritjen me 71,1 % dhe rënia më e madhe nga Kosova me 17,3 %.
Shtetasit shqiptarë dhe të huaj të dalë nga vendi gjatë muajit korrik 2017 janë 1.362.491, duke shënuar një rritje me 6,3 %, krahasuar me të njëjtën periudhë të një viti më parë.
Numri i shtetasve shqiptarë të dalë nga territori i Shqipërisë në shtatë mujorin e 2017-ës është 2.759.744 duke u rritur 4,9 %, krahasuar me njëjtën periudhë të një viti më parë.
Hyrjet e shtetasve të huaj në muajin korrik 2017, në rrugë tokësore zënë peshën më të madhe gjithsej me 76,9 %, ndërsa hyrjet në rrugë ajrore zënë 11,9 % dhe detare 11,2 %. /tesheshi.com/
