“Mos besoni atë që thonë në televizor dhe çfarë flasin gazetat. Këtu në Greqi gjithçka funksionon. Marrim mesazhe alarmuese nga çdo shtet i Europës, por nuk ka skena paniku dhe as radhë të gjata në bankomate”.
Ky është mesazhi që vjen nga një çift italianësh, të cilët jetojnë në periferi të Chania, një qytet në veri të Kretës. Ata kanë postuar mesazhin e tyre në Facebook. Siç tregon çifti italian, në Kretë aktivitetet tregtare vijojnë në normalitet dhe nga fotot nuk duket se ka radhë të gjata të njerëzve përpara bankomatëve.
Ndër të tjera, siç tregon çifti italian, për turistët, nuk ka limit 60 euro në tërheqjen e shumave të parave në bankomat, siç ndodh me vendasit, por ka limite të tjera, të përcaktuara më parë, siç është shuma prej 250 euro në ditë.
Ata kanë hapur një faqe në Facebook, me qëllimin që të mos alarmohen turistët për të ardhur në Kretë. “Jemi shumë larg nga skenat e panikut që shikojmë në televizor në rrugët e Athinës. Kreta duket një ishull me të vërtetë i lumtur. Për fat të keq, nuk mund të themi të njëjtën gjë për pjesën tjetër të vendit”,- shkruan çifti. /tesheshi.com/
