Tunizia është përfshirë nga protestat kundër shtrenjtimit të kostos së jetesës, gjashtë vjet pas nisjes së “Pranverës Arabe” që solli përmbysjen e regjimit të Ben Ali-së.
Në rreth 10 qytete tuniziane mjaft të rinj kanë protestuar kundër buxhetit të ri, i cili rrit taksat për një sërë produktesh dhe shërbimesh.
Protestat kanë sjellë edhe viktimën e parë, e cila është shkaktuar në qytetin e Tebourba-s.
Ministria e Shëndetësisë së Tunizisë thekson se 43-vjeçari Khemaies Yeferni ka vdekur nga plagët e rënda të shkaktuar në trup. I ndjeri ka arritur me asfiksi në spital dhe më pas ka humbur jetën.
Në Citè Etthadamen, periferi mjaft popullore e kryeqytetit Tunizi, një grup të rinjsh kanë nisur të plaçkisin një supermarket, çka ka shtyrë policinë të përdorë gazin lotsjellës.
Por pas këtij episodi në një sërë qytetesh kanë shpërthyer revolta të rinjsh.
Vendi prej kohësh vuan plagën e papunësisë dhe mungesës së shpresës. /tesheshi.com/
