Një sulm nga njerëz të armatosur la 53 të vdekur të hënën në Ben Gardane, një qytet kufitar në lindje të Tunizisë. Kryeministri tunizian, Hassid Essid, la të kuptohej se sulmi u krye nga militantët e ISIS-it.
Përplasja mes forcave tuniziane dhe mësymësve nisi në agimin e së hënës e vijoi gjer në mbrëmje. Një njoftim i qeverisë bën të ditur se nga sulmi dhe nga shkëmbimet e zjarrit mbetën të vdekur 35 sulmues, shtatë civilë, e 11 pjesëtarë të forcave tuniziane të sigurisë.
Qeveria vendosi ndalimqarkullimin në Ben Gardane, ndërsa kufiri mes Tunizisë dhe Libisë është mbyllur me nisjen e së martës.
Ben Gardane shihet si porta hyrëse për në Tunizi, dhe shërben si qendër për trafikuesit e armëve dhe kontrabandistët e çdo malli.
Javën e shkuar nisi në këtë qytet një fushatë ushtarake pasi zyrtarë tunizianë të sigurisë vunë alarmin për depërtimin në vend të grupeve terroriste.
Incidente vdekjeprurëse ka patur në vijimësi, siç qe ai i së mërkurës së shkuar, kur trupat tuniziane vranë pesë njerëz të armatosur në rrethinat e qytetit Ben Gardane. /tesheshi.com/
