Lulet holandeze përbëjnë një kërcënim sanitar për Rusinë dhe pritet të ndalohen në këtë vend, sipas autoriteteve, ndërsa analistët shprehen se kjo masë përbën “hakmarrjen” më të fundit të Moskës ndaj përpjekjeve holandeze për të zbardhur të vërtetën e rrëzimit të avionit malajzian MH17 mbi Ukrainë, I cili dyshohet të jetë qëlluar nga toka nga separatistët prorusë.
Autoritetet thanë se ndalesa e dërgesave të luleve nga Holanda e cila krenohet me tulipanët e saj, ka gjasa të vendoset shpejt.
Sipas një deklarate të agjencisë së Bujqësisë së Rusisë, lulet holandeze do të ndalohen pasi përmbajnë organizma të dëmshëm që përbëjnë kërcënim serioz për ekonominë e vendit dhe prodhimin bujqësor.
Sipas të dhënave nga Gazeta.ru, nga kjo masa kompanitë holandeze të luleve do të pësojnë dhjetëra milionë dollarë humbje.
Marrëdhëniet e Rusisë me Holandën u përkeqësuan pas rrëzimit të avionit MH17 në Ukrainë korrikun e kaluar, ku u vranë 298 persona, pjesa më e madhe holandezë. Qeveria holandeze ka kërkuar ngritjen e një tribunal për të proceduar përgjegjësit e rrëzimit të avionit që kundërshtohet me forcë nga Moska.
I pyetur nëse deklarata e agjencisë së Bujqësisë ka të bëjë me përgjigjen e Holandës në mbështetje të Tribunalit të OKB-së, zëdhënësi I Kremlinit, Dmitry Peskov tha se politizimi I kësaj cështjeje nuk është në axhendë.
Gushtin e kaluar, Rusia ndaloi importimin e mishit, bulmetit dhe produkteve të tjera nga anëtarët e BE-së në shenjë hakmarrjeje ndaj sanksioneve të Perëndimit për krizën e Ukrainës.
Holanda është eksportuesja më e madhe e luleve, me 10 miliardë tulipanë të prodhuar në vit, që përbëjnë 70 për qind të prodhimit botëror./tesheshi/
