Njeriu që po drejton PD-në zyrtare, Enkelejd Alibeaj, i bëri një skaner situatës në këtë forcë politike para demokratëve kavajas, duke e vënë theksin te Berisha.
Ai u kujtoi faktin se PD reale, meritore, nuk është ajo që lidhet me Berishën.
“Një pjesë e madhe qëndruan këtu, një pjesë tjetër ikën dhe nuk janë këtu. Përse? Vetëm për sjelljen e një personi, ai që të gjithë ne demokratët e kemi konsideruar lider historik e bëmë president e dy herë kryeministër, për një hall te vetin personal”, tha Alibeaj, duke sjellë në vëmendje faktin se nuk mund të ketë PD “në luftë” me SHBA.
“Historia e marrëdhënies së shtetit shqiptar me Shtetet e Bashkuara të Amerikës në fakt është historia e Partisë Demokratike në marrëdhënie me ta. Janë rrugë paralele”, tha ai, duke vijuar të zbërthejë Berishën, pikërisht në qytetin ku ai është mandatuar rregullisht si deputet në 30 vjet.
“Dhe është e papranueshme për Partinë Demokratike që të arrijë sot nga një pjesë që të merret për hallet personale, e të merret të shkojë tek një parti e majtë. Ku tek Ilir Meta! Ilir Meta nuk ishte ky që në 2013-në qeveriste me Partinë Demokratike?! Ishte ai i cili i la demokratët në baltë dhe shkoi bëri martesën e radhës me Edi Ramën.
E kuptoni pra se çfarë mëkat i madh politik është duke shkaktuar Sali Berisha. Por sot në ka një tradhti të madhe që po i bëhet Partisë Demokratike është pikërisht ajo përshkrova pak më sipër, që po i bën Sali Berisha”, theksoi Alibeaj. /tesheshi.com/
