Një tragjedi ajtore ndodhi në Indonezi, vendin e njohur për tsunamë, ku një avion i kompanisë “Lion Air” me 189 pasagjerë dhe ekuipazhin, u rrëzua të hënën në det në afërsi të ishullit të Java, menjëherë pas ngritjes nga kryeqyteti Xhakartë.
Ende nuk dihet nëse ka ndonjë të mbijetuar dhe se nga çfarë është shkaktuar aksidenti tragjik.
Boeing 737 u zhduk nga ekranet e radarëve rreth dhjetë minuta pas ngritjes.
Radari regjistroi se avioni ishte ngjitur në përafërsisht 1,520 metra përpara se të fillonte të humbiste lartësinë, duke rënë përfundimisht në det.
Mbetjet e avionit u gjetën në afërsi të vendit të kontaktit të fundit, tha Muhammad Syaugi, kreu i Agjencisë së Kërkimit dhe Shpëtimit.
“Ne nuk e dimë nëse ka ndonjë të mbijetuar. Shpresojmë, por ju lutem, ne nuk mund ta konfirmojmë”, tha ai në një konferencë shtypi.
Agjencia indoneziane e fatkeqësisë publikoi në internet fotot e bagazheve dhe pjesëve të avionit të mbledhura nga anijet e kërkimit dhe shpëtimit.
Sende të tilla si kufje dhe rripa sigurimi u gjetën në ujërat afër vendit ku Boeing 737 humbi kontaktin.
Agjencia Kombëtare e Kërkimit dhe e Shpëtimit thotë se gati 300 vetë, duke përfshirë ushtarë, oficerë policie dhe peshkatarë lokalë, janë angazhuar në kërkim dhe se asnjë trup nuk është gjetur deri tani, por vetëm sende personale të udhëtarëve dhe mbetje të avionit.
Në avion thuhet se kanë qenë të paktën dhe 23 zyrtarë qeveritarë. /tesheshi.com/
