Kryeministri grek Alexis Tsipras, para vizitës së tij në Beograd që nis sot, tha për mediat serbe se “Serbia ka një rol kyç në Ballkan e më gjerë dhe për këtë arsye do të ishte e dëshirueshme, veçanërisht për stabilitetin dhe zhvillimin e rajonit, që vendi të bëhet anëtare e plotë e familjes evropiane”.
“Greqia është e përkushtuar dhe do të vazhdojë të mbështesë në mënyrë aktive Serbinë në rrugën e saj për t’u bashkuar me BE, duke besuar se kjo do të jetë një hap me përfitim reciprok”, tha ai në një intervistë për Politika-n.
Vizita e Tsiprasit në Serbi, do të jetë vizita e parë e një kryeministri grek në shtatë vjet. Vetë ai ka qenë në 2014 në Beograd, por si udhëheqës i SYRIZA-s.
Tsipras bëri të ditur se gjatë takimit me udhëheqjen e Serbisë do të diskutojë shumë çështje të rëndësishme, njëra prej të cilave është që të forcojë më tej bashkëpunimin dypalësh ekonomik.
“Ne synojmë të forcojmë bashkëpunimin tonë në sferën e transportit dhe infrastrukturës. Në këtë kuadër e rëndësishme është ndërtimi i hekurudhës nga Pieru në Beograd për të cilën paratë i ka dhënë Kina”, tha kryeministri grek. /tesheshi.com/
