Kryeministri i Greqisë, Aleksis Tsipras, do të zhvillojë një vizitë zyrtare në Turqi, e cila konsiderohet shumë e rëndësishme si nga Ankaraja ashtu edhe nga Athina.
Me ftesë të Kryeministrit të Turqisë, Ahmet Davutoglu, Tsipras do zhvillojë një vizitë dyditore në Turqi.
Kryeministri grek do ta nisë turin turk me me takimin që do të ketë në Stamboll me Patrikun Grek të Fanarit, Bartolomeos, kurse të mërkurën pritet të ketë takime të ndara në Ankara me Kryeministrin Davutoglu dhe Presidentin Rexhep Tajjip Erdogan.
Pikat kryesore të takimeve do të fokusuara tek marrëdhëniet dypalëshe dhe problemi i refugjatëve, zhvillimet rajonale dhe ato ndërkombëtare.
Pritet që gjatë kontakteve të tij në Ankara Kryeministri i Greqisë të rikonfirmojë përkrahjen e vendit të tij ndaj anëtarësimit të Turqisë në Bashkimin Europian, kurse në lidhje me krizën e refugjatëve do të përsërisë edhe një herë mendimin e tij për ti kryer brenda territorit të Turqisë veprimet për regjistrimin e emigrantëve të jashtëligjshëm.
Tsipras, para se të nisej për në Turqi bëri një vizitë në Ministrinë e Punëve të Jashtme të Greqisë dhe mori informacione nga shefi i diplomacisë greke, Nikos Kotziaz mbi temat aktuale të politikës së jashtme.
Një çështje tjetër e rëndësishme e kontakteve të Kryeministrit grek në Ankara do të jetë edhe mundësia e realizimit të kontrolleve të përbashkëta në Detin Egje në kuadër të luftës me emigracionin e jashtëligjshëm.
Ndërkaq Kryeministrat e Turqisë dhe të Greqisë nesër në darkë do të ndjekin bashkë ndeshjen miqësore mes dy kombëtareve.
/tesheshi.com/
