Mungesa e marrëveshjes për Greqinë do të nënkuptonte “fillimin e fundit” për Eurozonën, theksoi Kryeministri grek, Aleksis Tsipras, në një intervistë sot për të përditshmen italiane, “Corriere della Sera”.
Pyetur nëse një dështim i Greqisë do të nënkuptonte një dështim të Evropës, Tsipras u përgjigj në këtë intervistë eskluzive: “Mendoj se kjo është e dukshme. Ky do të ishte ‘fillimi i fundit’ të eurozonës”.
Për Kryeministrin grek, një dështim i Greqisë do të çonte në mënyrë të pashmangshme tregjet financiare të kërkonin një lidhje tjetër të dobët në zonën euro. “Nëse Greqia dështon, tregjet do të shkojnë menjëherë të kërkojnë një tjetër viktimë”, theksoi ai, duke iu referuar Spanjës dhe Italisë.
“Nëse drejtuesit evropianë nuk mund të zgjidhin probleme si ai i Greqisë, që përbën dy për qind të ekonomisë së saj, cili do të jetë reagimi i tregjeve për vendet, që përballojnë probleme më të mëdha, si Spanja apo Italia, borxhi publik i të cilave është rreth 2.000 miliardë euro?”, pyet shefi i Athinës zyrtare.
Ai fundit u shpreh optimist dhe konfirmoi se një marrëveshje mes Greqisë dhe kreditorëve ndërkombëtarë është shumë pranë. “Mendoj se jemi shumë pranë një marrëveshjeje (…) mungon vetëm miratimi i një qëndrimi pozitiv për propozimet tona alternative”, konfirmoi Tsipras.
