“Dëmshpërblimi i dëmeve të luftës është një detyrim historik që Gjermania duhet ta përmbushë”. Kjo ka qenë deklarata e Tsipras në Parlamentin grek, e cila ka rënë si një bombë për Gjermaninë e Merkel.
Bëhet fjalë për 50% të borxhit, i cili në vitin 1953 nuk u pagua nga Federata Gjermanie pas dëmeve të shkaktuara nga Gjermania naziste në të gjitha vendet e Europës, përfshirë edhe Greqinë.
Pra, e thënë ndryshe, Athina zyrtare po i tregon muskujt Berlinit. “Impenjohem se do të respektoj tërësisht programin e partisë me të cilin kam fituar zgjedhjet”,- ka thënë Alexis Tsipras, gjatë fjalës së tij në Parlamentin grek.
Më pas, lideri i SYRIZA-s ka vijuar me sulmin kundër Gjermanisë, duke thënë: “Duam të na kthehen dëmet e luftës të shkaktuara nga nazistët”.
“Greqia,- ka thënë Tsipras në Parlament,-“ka një detyrim moral përpara popullit të saj dhe historisë, ashtu si edhe të gjithë europianët që kanë luftuar dhe kanë dhen jetën e tyre kundër nazizmit. Detyra jonë është të kërkojmë të na kthehet borxhi dhe dëmet e shkaktuara gjatë 4 viteve të luftës”.
Ai bëri me dije se do të ndërtohet një Greqi e pavarur ekonomikisht dhe partnere në të njëjtin nivel me vendet e Bashkimit Europian ne Eurozonë./tesheshi.com/
