Me ftesën e LDK-së së Isa Mustafës, partitë politike të Kosovës kanë marrë pjesë në një takim të përbashkët për të shqyrtuar gjendjen e krijuar në vend. Por ky takim ashtus siç pritej nuk ka rezultuar me arritjen e ndonjë marrëveshjeje për mbajtjen e zgjedhjeve të parakohshme, përveç dakordësisë të mbahet sërish tryeza të tilla.
Edhe pse u paralajmërua se në takim do të diskutohet për caktimin e datës së zgjedhjeve të parakohshme parlamentare në vend, përfaqësuesi i LDK-së, Agim Veliu ka mohuar një gjë të tillë, duke thënë se takimi është organizuar për të diskutuar me subjektet politike dhe të bëhet përpjekje që të gjenden zgjidhjet për çështjet që janë me interes për Kosovën.
“Ne jemi të interesuar që çështjet madhore për Kosovën t’i diskutojmë dhe së bashku të gjejmë zgjidhje. Ne po bëjmë përpjekje që ta japim kontributin tonë, që ta arrijmë një konsensus nacional për këto tema dhe pastaj, nëse nuk arrihet, ne sigurisht që do ta diksutojmë në forumet tona dhe do të marrim qëndrim”, tha Veliu.
Memli Krasniqi, shef i grupit parlamentar të PDK-së ka pohuar se temat e diskutuara në takim, kanë rastisur të kenë ngjashmëri me ftesën që ka bërë ditë më parë kryetari i PDK-së, Kadri Veseli, për një platformë gjithpërfshirëse dhe konsensus për temat kombëtare.
Ai ka shtuar se tash nuk është koha për zgjedhje të jashtëzakonshme dhe se qëndrimi i PDK-së është se ky mandat qeverisës duhet të shkojë deri në fund.
Blerim Kuçi, deputet i AAK-së ka deklaruar i ka apo si ka numrat, qeveria po funksionon, duke aluduar në zërat opozitarë për mbajtjen e zgjedhjeve të reja.
Bilall Sherifi, shef i grupit parlamentar të Nismës Socialdemokratike, tha se vendi nuk duhet të shkojë në zgjedhje të parakohshme.
“Nisma mendon se janë dy mënyra për ta dërguar vendin në zgjedhje: me marrëveshje ndërmjet partive politike, si dhe është rruga e mocionit të mosbesimit. Ne nuk mendojmë që vendi duhet të shkojë në zgjedhje. Konsiderojmë që qeveria sapo ka filluar punën dhe duhet t’i lihet kohë dhe hapsirë që ta vazhdojë punën e saj”, theksoi Sherifi.
Në këtë takim, partitë politike parlamentare dhe ato jashtë Kuvendit, janë pajtuar që takime të ngjashme sikurse kjo e ditës së mërkurë, të organizohen përsëri nga partitë tjera politike, me rotacion. Siç është thënë nga përfaqësuesit e partive politike, takimi i ardhshëm, së shpejti, pritet të organizohet nga Partia Demokratike e Kosovës. /tesheshi.com/
