Pas dy orëve ka mbaruar takimi i “ashtuquajtur historik” ndërmjet liderëve të partive shqiptare në Maqedoni. Pjesëmarrës në këtë takim me ftesë të kreut të BDI-së, Ali Ahmeti ishin vetëm përfaqësues të koalicionit Aleanca për Shqiptarët në krye me Ziadin Selën, ndërsa Lëvizja BESA dhe PDSH, ashtu siç kishin paralajmëruar nuk iu përgjigjën kësaj ftese.
Ahmeti dhe Sela pas këtij takimi nuk kanë zbuluar detaje konkrete, por kanë bërë të ditur se një takim i këtillë do të ndodhë edhe javën e ardhshme me përpjekje
“Dallimet janë më të vogla se sa çështjet që na bashkojnë. Bëmë harmonizimin e qëndrimeve. Takimi nuk ishte komplot ndaj partive tjera që nuk morën pjesë”, tha shkurt Ali Ahmeti.
Nga ana tjetër edhe Ziadin Sela ishte konçiz në qëndrimin e tij, duke theksuar vetëm rëndësinë e këtij takimi, dhe keqardhjen e mos prezencës së partive tjera. Me këtë sipas tij, Lëvizja BESA dhe PDSH dëshmuan që janë kundër tyre.
“Takimi ishte i rëndësishëm për politikbërjen e ardhshme shqiptare. Ata që nuk ishin prezent, janë kundër kësaj. Jemi për të drejta të barabarta”, tha shkurt Sela pas takimit.
Për çështjet konkrete të cilat janë biseduar gjatë takimit, liderët njoftojnë se gjatë ditës së nesërme do të dalin me kumtesë të përbashkët. M.Krasniqi
