Brazili nuk gjen qetësi. Protestat këtë herë janë për presidentin Michel Temer, i cili gjendet nën hetim për korrupsion.
Presidenti nuk ua ka vënë veshin deri tani thirrjeve për dorëheqje, e veç kësaj ka urdhëruar më së fundi që trupat federale të rikthejnë rendin në kryeqytetin e vendit.
Që prej protestave antiqeveritare të katër viteve më parë, protesta e së mërkurës ka qenë më e dhunshmja në Brazilia.
Mijëra protestues do të marshonin drejt Kongresit duke kërkuar largimin e presidentit nga detyra, ndërsa disa ministri u zbrazën gjatë përplasjeve mes tyre dhe policisë.
Ministri i Mbrojtjes i vendit amerikanolatin, Raul Jungmann, tha teksa iu drejtua bashkëqytetarëve në një dalje të shkurtër televizive se po dërgoheshin trupa për të mbrojtur godinat federale, si dhe pallatin presidencial.
Dislokimi i trupave është autorizuar nga një dekret i presidentit, me mundësinë e përdorimit më të gjerë të ushtarëve në Brazilia.
Korrespondentja e Al Jazeera-s në Brazilia e ka quajtur dislokimin e trupave si tejet të pazakontë.
“Eshtë hera e parë që nga viti 1980, kur Brazili ishte nën një diktaturë ushtarake, që ka ngjarë diçka e ngjashme… Fakti që ai (presidenti Temer) e bëri këtë është parë nga shumë njerëz si një akt dëshpërimi…,” citon Al Jazeera korrespondenten. /tesheshi.com/
