Kryeministri Rama përcolli një paralajmërim plot nerv e tension, pasi u ballafaqua me pamje nga tregjet në Tiranë, ku mizëria njerëzore injoron tërësisht distancimin social në ngarrendje për blerjen e ushqimeve.
Nëse ky është niveli i kuptimit të detyrës njerëzore, qytetare e atdhetare, në frontin e kësaj lufte për jetë a vdekje dhe meqë mesa duket ecurinë pozitive të luftës deri tani, shumëkush po e kupton gabimisht si arsye për t’u lëshuar me idenë se s’na gjen gjë, atëherë përgjigja e shtetit do të jetë reciproke për këdo që nuk do të hyjë në rresht për të mbajtur radhë!”, shkruan shefi i qeverisë.
Ai paralajmëron se që nga e hëna shteti do veprojë me forcë të shtuar.
“Ushtria dhe policitë bashkiake do të shtrëngojnë urgjentisht kordonët sanitarë të tregjeve. Policia e Shtetit do të godasë shkelësit me masa të reja ndëshkimore!
Masat e reja ndëshkimore do të jenë ligj ditën e hënë dhe për kokëshkretët do të shkohet deri në heqje lirie!
Nëse do të lehtësojmë me pikatore popullin e përgjegjshëm, kokëshkretëve do t’ua bëjmë ferr këtë vijë të shtrembër sjelljeje që na fut në zjarrin e ferrit të gjithëve!”, shkruan Rama, i cili në fund bën dhe një paralele me kombëtaren shqiptare.
“Tirana është vatra më e rrezikshme e luftës. Durrësi njësoj si Tirana mund të kthehet në Vaterlonë tonë. Shkodra është tanimë një bombë me sahat. Fieri është një rrezik i madh potencial.
Kudo mund të na iki avantazhi që kemi krijuar, nëqoftëse do ta bëjmë si kombëtarja kuqezi që pjesën e parë duket sikur do fitojë, pastaj… harrojeni, këtë luftë nuk kemi për ta humbur për ata që s’kanë mendje dhe këllqe të luftojnë si mbarë populli shqiptar”, përfundon apeli i të parit të qeverisë. /tesheshi.com/
