Presidenti amerikan Donald Trump u përpoq të premten fitojë zemrat e elitës së biznesit dhe asaj politike botërore në Davos duke paraqitur Shtetet e Bashkuara si vendi me performancën më të mirë, por ndërsa disa nga audienca admironin politikën e tij ekonomike, tek tjerët ai hasi në një pritje shumë të ftohtë.
Në fjalimin e tij 15-minutësh, gjatë paraqitjes së tij të parë në Forumin Ekonomik Botëror në Alpet zvicerane, Trump ofroi “miqësinë dhe partneritetin” e Amerikës në tregti dhe siguri, dhe argumentoi se ‘Amerika në radhë të parë’ nuk do të thotë ‘Vetëm Amerika”.
“Bota po përjeton kthimin e një Amerike të fortë dhe të begatë. Amerika është e hapur për biznes dhe ne jemi përsëri konkurrues”, tha kreu i SHBA.
Trump mbajti një fjalim politik klasik në një ton të qetë, dhe komplimentoi masën prej rreth 1,500 vetësh, duke thënë se ajo përbëhej nga disa prej “qytetarëve më të jashtëzakonshëm” të botës.
Reagimet e përziera të marra nga presidenti amerikan pasqyrojnë shumëllojshmërinë e liderëve që marrin pjesë në forum – nga drejtorët me interesa biznesi në Amerikë, tek politikanët, drejtuesit e organizatave ndërkombëtare dhe organizatat joqeveritare. /tesheshi.com/
https://youtu.be/GZIhF1ptliU
