Një urdhër ekzekutiv i nënshkruar nga presidenti amerikan Donald Trump ka pezulluar për 120 ditë programin për refugjatët të SHBA-së, duke e ndaluar hyrjen e refugjatëve sirianë në vendin e tij gjer në një njoftim tjetër.
Ky urdhër e pezullon për katër muaj pranimin e të gjithë refugjatëve në SHBA.
I paralajmëruar me kohë, urdhri parashikon dhe ndalimin e lëshimit të vizave për tre muaj për qytetarët e gjashtë vendeve të tjera me popullsi mbizotëruese muslimane, përfshirë Iranin, Irakun, Jemenin dhe Libinë. Dy vendet e tjera besohet të jenë Sudani dhe Somalia.
Trump deklaroi pas nënshkrimit se nisma do t’i mbrojë amerikanët nga sulmet terroriste.
“Ne duam të pranojmë në vendin tonë vetëm ata që kanë për ta mbështetur atë dhe do ta duan thellësisht popullin tonë.”
Siç e la vetë të kuptohej dje Donald Trump, të krishterëve do t’u jepej përparësi mes sirianëve që do të kërkonin në të ardhmen statusin e refugjatit.
Vendimi është dënuar nga grupet e të drejtave civile. Ato e kanë quajtur atë diskriminues, duke shtuar se nuk ka lidhje mes refugjatëve sirianë në SHBA dhe terrorizmit. /tesheshi.com/
