Autoriteti Palestinez dhe zyrtarët të saj kanë dënuar vendimin e Departamentit të Shtetit të SHBA për të hequr emrin “Autoriteti Palestinez” dhe “Territoret Palestineze” nga lista e shteteve dhe territoreve në faqen e saj zyrtare.
Ministria Palestineze e Punëve të Jashtme thotë se vendimi nuk mund të zhvlerësojë ekzistencën e popullit palestinez dhe shtetin e Palestinës brenda kufijve të 1967.
Masa e re amerikane vjen në një kohë kur administrata e Presidentit Donald Trump po punon për të formuar planin e saj të paqes mes palestinezëve dhe Izraelit.
Palestinezët e shohin këtë veprim provokues, sepse lista e vendeve të Lindjes së Mesme në faqen e internetit të Departamentit të Shtetit nuk bën asnjë përmendje të palestinezëve, qoftë përmes përdorimit të emrit “Autoriteti Palestinez” ose “Territoret Palestineze”.
Disa muaj para kësaj lëvizjeje, Departamenti i Shtetit hoqi fjalën “territore të okupuara” nga një raport që i referohej Bregut Perëndimor dhe Rripit të Gazës.
Autoriteti Palestinez e sheh veprimin e Uashingtonit si një grusht shteti i paparë në politikën e jashtme amerikane, duke thënë se nuk do mund ta zhvlerësojë Palestinën si një shtet të okupuar.
Omar Avadalah, kreu i departamentit të Kombeve të Bashkuara dhe organizatave të specializuara në Ministrinë e Punëve të Jashtme Palestineze, tha se qeveria palestineze do të kundërshtonte vendimin me të gjitha instrumentet e ligjit ndërkombëtar.
Ministria theksoi se një veprim i tillë nga SHBA nuk e zhvlerëson njohjen e Palestinës nga 140 vende dhe statusin e saj si një shtet vëzhgues i Kombeve të Bashkuara dhe praninë e saj në këtë organizatë e veçanërisht në UNESCO dhe Këshillin e të Drejtave të Njeriut, përveç anëtarësimit në më shumë se 100 marrëveshje dhe konventa ndërkombëtare.
“Qeveria e tanishme amerikane po ndjek vizionin e Izraelit për shkatërrimin e zgjidhjes dy-shtetërore dhe largimin e të drejtave që rrjedhin nga ajo”, tha Ministria në një deklaratë për shtyp.
Masa e fundit e administratës amerikane është parë nga palestinezët si një dhuratë e re nga administrata e Trump për kryeministrin izraelit Benjamin Netanyahu, një muaj përpara zgjedhjeve.
Vendimi për zhvendosjen e ambasadës amerikane në Jeruzalem ishte thjesht një prelud për përkeqësimin e marrëdhënieve midis Autoritetit Palestinez dhe administratës amerikane, e ndjekur nga mbyllja e zyrës së ULP në Uashington dhe pezullimi i ndihmës amerikane për UNRWA dhe spitalet palestineze në Jeruzalem. /tesheshi.com/
