Donald Trump akuzoi Emmanuel Macron për “lëpirjen” e liderit kinez Xi Jinping pas vizitës së presidentit francez në Pekin, gjatë një interviste me Fox News që u transmetua të martën.
Macron është kritikuar nga disa qarqe për shkak të qëndrimit të tij në të cilin ai i bëri thirrje Bashkimit Evropian që të mos bëhet “pasues” as i Amerikës dhe as i Kinës, veçanërisht për çështjen e Tajvanit, pas kthimit të tij nga Azia.
“Macron, i cili është miku im, shkon në Kinë dhe lëpin (Xi Jinping)”, pohoi ish-presidenti Trump.
Ish-presidenti republikan fajësoi administratën e pasardhësit të tij demokrat, Joe Biden, për dobësimin e rolit udhëheqës të SHBA-së në skenën ndërkombëtare, deri në atë masë sa po humbet mbështetjen e aleatëve të saj tradicionalë.
“Bota është shkatërruar, po shpërthen kudo dhe SHBA-ja nuk ka arsye për këtë”, tha Trump.
“Unë thashë ‘në rregull! Franca po shkon në Kinë tani”, shtoi ai.
Por administrata e Biden-it është përpjekur të çdramatizojë situatën, duke pohuar se marrëdhëniet dypalëshe me Francën janë të shkëlqyera.
Përballë reagimeve, presidenca franceze mbrojti qëndrimin e zotit Macron, duke gjykuar se duhet dëgjuar “zëri i veçantë” i Europës. /tesheshi.com/
