Presidenti Donald Trump ka shpallur emergjencë kombëtare për të mbrojtur rrjetin kompjuterik amerikan nga “kundërshtarët e huaj”.
Ai nënshkroi një urdhër ekzekutiv i cili pengon kompanitë amerikane që të përdorin telekomin e huaj, i cili besohet se ekspozon ndaj rrezikut të sigurisë.
Sipas një deklarate të Shtëpisë së Bardhë, urdhri i z. Trump ka për qëllim “të mbrojë Amerikën nga kundërshtarë të huaj, të cilët në mënyrë aktive dhe gjithnjë e më shumë po krijojnë dhe shfrytëzojnë dobësitë në infrastrukturën dhe shërbimet e teknologjisë së informacionit dhe komunikimit”.
Ai i jep Sekretarit të Tregtisë fuqinë që “të ndalojë transaksionet që paraqesin një rrezik të papranueshëm për sigurinë kombëtare”, thuhet në deklaratë.
Urdhri nuk specifikon ndonjë emër apo kompani, por mendohet se shënjestron kompaninë Huawei.
Gjigandi teknologjik kinez tha se ndalimi i biznesit të tyre në SHBA vetëm sa do të dëmtonte kompanitë dhe konsumatorët amerikanë.
Shumë shtete, e në krye të tyre SHBA-të, kanë ngritur shqetësime muajt e fundit lidhur me përfshirjen e produkteve kineze në spiunim.
SHBA u ka bërë presion aleatëve që të shmangin Huawein në rrjetet e tyre 5G.
SHBA tashmë ka kufizuar agjencitë federale nga përdorimi i produkteve Huawei dhe ka inkurajuar aleatët për t’i shmangur ato, ndërkohë që Australia dhe Zelanda e Re kanë bllokuar përdorimin e pajisjes Huawei në rrjetet mobile të gjeneratës së ardhshme 5G. /tesheshi.com/
