Favoriti republikan në garën brenda partisë për t’u nominuar në presidencialet e vitit të ardhshëm, Donald Trump ka tërhequr sërish kritika të ashpra për qëndrimet e tij, e këtë radhë në qendër janë komentet në lidhje me muslimanët në Amerikë.
Trump nuk hodhi poshtë e as korrigjoi komentet e një mbështetësi të tij që tha se presidenti Obama është musliman dhe madje, nuk është fare amerikan. Republikani u përpoq t’i kalonte me të qeshur komente të tilla, por mbështetësi në fjalë nuk hoqi dorë duke vazhduar: “Ne kemi një problem në këtë vend, që janë muslimanët”.
Komentet u bënë gjatë një tubimi të fushatës së Trump në Nju Hampshire.
Kandidatja e kampit democrat, Hillary Clinton e cilësoi mosreagimin e Trump për të denoncuar “retorikën e urryer” kundër myslimanëve si shqetësuese dhe të gabuar.
Ndërsa mbështetësi i Trump që mori fjalën në tubim deklaronte se muslimanët janë problemi i Amerikës, Trump nuk bëri tjetër por tha “Na duhet kjo pyetje?”, dhe qeshi. Tjetri vijoi të pyesë për kampet e trajnimit që sipas tij, ndodhen në Amerikë e ku strëviten njerëz “që duan të na vrasin”. “Kur do t’i heqim qafe këto”, pyeti ai.
Në përgjigjen e tij, Trump nuk sqaroi aspak qëndrimet e tij për këto cështje, por vetëm tha se “gjërat e këqija ndodhin” dhe se ai do të shohë se c’mund të bëjë.
Media sociale zjen nga komentet kundër kandidatit miliarder, Donald Trump, e në një postim në Tëitter, edhe Clinton i është bashkuar zërave duke kërkuar që Trump të mos vijojë më tej për shkak të qëndrimit të gabuar që mban për retorikën e urryer antimuslimane.
Me anë të një deklarate, Komiteti Kombëtar Demokratik tha se se “racizmi i Trump nuk njeh kufij”.
Menaxheri i fushatës së Trump u përpoq të sqaronte incidentin duke i thënë medias se kandidati kishte dëgjuar vetëm pjesën e pyetjes për kampet e trajnimit.
“Media dëshiron ta rrotullojë këtë rreth Obamës. Problemi më i madh është se Obama po zhvillon një luftë kundër të krishterëve në këtë vend”, tha menaxheri Lewandowski për “Washington Post”.
Më herët, Trump ka tërhequr kritika pa fund për shumë tema, si emigracioni, gratë apo komentet tallëse për kolegët. /tesheshi.com/
