I përballur me një pengesë deri tani të pakalueshme, siç janë gjykatat amerikane, presidenti Donald Trump po bëhet gati me sa duket të gjejë zgjidhje te një urdhër tjetër ekzekutiv për ndalimin e udhëtimit për në SHBA të qytetarëve të disa shteteve.
Trump po merr në konsideratë një urdhër të ri ekzekutiv për t’i ndaluar qytetarët e vendeve të caktuara të udhëtojnë drejt vendit të tij, raporton rrjeti gjigand informativ britanik BBC.
Presidenti amerikan u ka deklaruar gazetarëve në Air Force One se një urdhër i ri mund të lëshohet të hënën apo të martën e javës që vjen. Ai ka bërë të ditur se urdhri i ri do të ndryshonte fare pak nga i mëparshmi, por pa dhënë hollësi të mëtejshme.
Pavarësisht nga ajo çka premtoi, duket se procesi në gjykatë për urdhrin e parë do të vijojë ende.
“Ne kemi për ta fituar këtë betejë. Pjesa e pafat është se kjo kërkon kohë. Por ne kemi gjithashtu shumë alternativa të tjera…,” do të dëgjonin gazetarët të thoshte Trump-i.
Një gjykatë apeli në San Francisko la në fuqi një ditë më parë pezullimin e të shumëpërfolurit dhe të shumëkundërshtuarit urdhër ekzekutiv për ndalimin e hyrjes në SHBA të refugjatëve dhe qytetarëve nga një sërë vendesh me shumicë muslimane. /tesheshi.com/
