Ka një krizë të marrëdhënieve ndërmjet Shteteve të Bashkuara dhe Pakistanit, aleatit më të rëndësishëm të Uashingtonit prej mëse 40 vjetësh, i cili është edhe zotërues i armëve bërthamore.
Presidenti Trump, në një twitt gjatë natës së shëmbimit të viteve, shprehej me zemërim se Shtetet e Bashkuara i kanë dhënë “marrëzisht” Pakistanit mbi 33 miliardë dollarë ndihmë gjatë 15 viteve të fundit dhe si shkëmbim nuk kanë marrë “asgjë, përveç gënjeshtrave dhe mashtrimit, duke i konsideruar udhëheqësit e vendit tonë si budallenj”.
“Ata u japin strehë terroristëve të cilët ne i kemi luftuar në Afganistan, me shumë pak ndihmë nga të tjerët. Mjaft më!” e përfundonte Trump komentin e tij në Twitter.
Menjëherë ka reaguar Pakistani, i cili ka thirrur në sqarime ambasadorin amerikan në Islamabad.
Ndërkaq, ministri i Jashtëm Khawaja Asif tha se vendi i tij “do t’i tregojë botës të vërtetën, dallimin mes fakteve dhe trillimeve”.
Presidenti i Pakistanit ka mbledhjur Këshillin e Sigurisë për të shqyrtuar situatën pas akuzave të Trump.
Uashingtoni ka akuzuar institucionet e sigurisë të Pakistanit për ofrimin e ndihmës fshehurazi për talebanët afganë dhe rrjetin Hakani për të kryer sulme në rajonin kufitar kundër forcave afgane dhe forcave të udhëhequra nga Shtetet e Bashkuara.
Islamabadi i mohon akuzat për strehim të kryengritësve afganë, duke u ankuar se ata po e përdorin vendin fqinj për të planifikuar sulme terroriste kundër Pakistanit. /tesheshi.com/
