Kryeministri çek, Andrej Babish hodhi poshtë propozimin e Presidentit të këtij vendi, Milos Zeman që Republika Çeke duhet të ndjekë shembullin e Shteteve të Bashkuara për të lëvizur ambasadën e saj në Izrael nga Tel Avivi në Jerusalem.
“Kjo ide e Presidentit amerikan Trump nuk është e mirë. Kjo më së miri mund të shihet përmes reagimeve”, tha Babish të premten për radiostacionin e shtetit çek, raporton AP.
Kryeministri i ri çek theksoi të premten se “shtetet e mëdha duhet të përpiqen për paqe”. Ndërkohë, Ministria e Jashtme e Çekisë tha se nuk ka asnjë plan për të ndjekur shembullin e presidentit amerikan.
Presidenti Zeman, megjithatë, në një intervistë televizive të enjten tha se ishte i kënaqur me vendimin e Trump dhe se Republika Çeke dhe Bashkimi Evropian duhet të bëjnë të njëjtën gjë me SHBA.
AP kujton se Zeman pati thënë në vitin 2013 se Republika Çeke duhet të lëvizë ambasadën e saj në Jerusalem, duke shkaktuar reagime në mesin e udhëheqësve arabë.
Pozicioni i presidentit çek është kryesisht ceremonial, ndërsa qeveria është përgjegjëse për politikën e jashtme, shkruan AP. /tesheshi.com/
