Presidenti amerikan Donald Trump tha të mërkurën se do të takohet me homologun e tij rus Vladimir Putin në Arabinë Saudite, pasi ata ranë dakord në një telefonatë të mëparshme për të nisur menjëherë negociatat për t’i dhënë fund luftës në Ukrainë.
“Do të takohemi në Arabinë Saudite”, u tha Trump gazetarëve në Shtëpinë e Bardhë.
Përveç bisedimeve me Putinin, Trump foli edhe me presidentin ukrainas Volodymyr Zelensky të mërkurën.
Në një postim të gjatë në rrjetin e tij social Truth Social, Trump tha se ai dhe Putin “ranë dakord që ekipet e tyre të fillonin negociatat menjëherë”.
Kremlini njoftoi se Trump dhe Putin folën për rreth një orë e gjysmë dhe se kishin rregulluar takimin. Agjencia ruse e lajmeve TASS raportoi se Putin e ftoi Trump-in të vizitonte Moskën.
Republikani në postimin e tij flet për një bisedë “të gjatë dhe shumë produktive” me homologun rus mbi “Ukrainën, Lindjen e Mesme, energjinë, inteligjencën artificiale, fuqinë e dollarit dhe tema të ndryshme”.
Zelensky dëshiron të “bëjë paqe”
Pasi foli me presidentin ukrainas, Trump shkroi në Truth Social se Zelensky dëshironte të “bënte paqe”.
“Biseda shkoi shumë mirë. Ai, ashtu si presidenti Putin, dëshiron të bëjë paqe”, shkroi ai.
Zyra e Zelensky-t më pas njoftoi se ai dhe Trump kishin folur për rreth një orë dhe vetë presidenti ukrainas shkroi në platformën X se ai dhe Trump diskutuan “mundësitë për arritjen e paqes”, “gatishmërinë tonë për të punuar së bashku… dhe aftësitë teknologjike të Ukrainës… duke përfshirë dronët dhe industritë e tjera të avancuara”.
Trump më vonë tha se nuk mendonte se ishte praktike që Ukraina të anëtarësohej në NATO dhe se nuk kishte gjasa që vendi të rimarrë të gjithë territorin e tij.
Mediat ruse kishin spekuluar më parë se dy liderët mund të takoheshin në një vend të tretë, duke përmendur Arabinë Saudite dhe Emiratet e Bashkuara Arabe. /tesheshi.com/
