Ukraina duhet ta harrojë NATO-n, tha presidenti amerikan Donald Trump gjatë takimit të tij me kryeministrin britanik Keir Starmer.
“Ata duhet ta harrojnë NATO-n, sepse kjo është arsyeja pse gjithçka filloi”, tha presidenti amerikan, duke iu referuar agresionit rus mbi fqinjin e tij.
Ai shprehu gjithashtu besimin e tij se do të arrihet një marrëveshje për t’i dhënë fund luftës në Ukrainë dhe se “do të jetë një paqe afatgjatë”.
NOW – Trump says Ukraine will not join NATO. pic.twitter.com/sNY6lwVJLA
— Disclose.tv (@disclosetv) February 27, 2025
Presidenti Donald Trump tha se ai dhe kryeministri i Mbretërisë së Bashkuar Keir Starmer diskutuan hapat për të arritur një armëpushim në luftën në Ukrainë gjatë takimeve të tyre në Shtëpinë e Bardhë.
“Siç kam diskutuar me kryeministrin Starmer, hapi tjetër që po bëjmë është drejt një armëpushimi shumë të arritshëm. Shpresojmë që kjo të ndodhë shpejt”, tha Trump në një konferencë shtypi me udhëheqësin britanik.
Trump tha se ata po marrin një qasje të “logjikës së përbashkët” për t’i dhënë fund luftës, që do të thotë që të dyja palët duhet të bisedojnë.
Në të njëjtën kohë, Donald Trump konfirmoi “mbështetjen” e tij për klauzolën e mbrojtjes kolektive të traktatit themelues të NATO-s (neni 5), një gur themeli i Aleancës që parashikon që në rast se një shtet anëtar sulmohet, anëtarët e tjerë angazhohen të nxitojnë për të ndihmuar.
I pyetur për Nenin 5 në konferencën për shtyp pas takimit me kryeministrin britanik Keir Starmer në Shtëpinë e Bardhë, Donald Trump u përgjigj “Unë e mbështes atë”, por shtoi “Unë nuk mendoj se do të kemi një arsye” për ta thirrur atë. /tesheshi.com/
