Presidenti amerikan Donald Trump zyrtarisht filloi fushatën për zgjedhjet e vitit 2020 përpara një turme të madhe në Orlando, Florida.
“Ne do ta vazhdojmë ta bëjmë Amerikën të lavdishme dhe pastaj do ta ruajmë lavdinë e saj”, tha Trump duke mos harruar sulmet ndaj kundërshtarëve dhe mediave.
“Ne do ta mbajmë vendin më mirë se kurrë më parë dhe prandaj qëndroj para jush, për të nisur zyrtarisht fushatën time për një mandat të dytë si president i Shteteve të Bashkuara”, i tha Trump turmës së mbledhur në Orlando.
Fjalimi i së martës po konsiderohet si fillimi zyrtar i ofertës së “Trump 2020”. Biznesmeni i kthyer në politikan paraqiti dokumentet zyrtare për kandidaturën e dytë qysh në ditët e para të inaugurimit si president. Ai që atëherë ka mbajtur mitingje në të gjithë Shtetet e Bashkuara.
Të martën, sulmet e Trump ndaj kundërshtarëve dhe qëndrimet konservatore mbi nacionalizmin, abortin, familjen, gjyqësorin dhe armët, u pritën pozitivisht nga turma besnike, të cilët shpesh shpërthyen në sloganet “na e rikthe lavdinë”. /tesheshi.com/
