Fjalimi më i fundit i kandidatit republikan në zgjedhjet presidenciale në SHBA e ka rindezur debatin. Donald Trump akuzohet se u ka kërkuar mbështetësve të tij ta ndalin Clinton-in duke ushtruar të drejtat e tyre të armëve.
“Hillary kërkon ta shfuqizojë në thelb Amendamentin e Dytë,” do t’u thoshte Trump të tubuarve në Karolinën e Veriut.
“Nëse ajo i zgjedh gjykatësit e saj, asgjë nuk mund të bëni njerëz,” ka theksuar kandidati republikan.
Ai ka sugjeruar që poseduesit e armëve apo ata të cilët i mbështesin të drejtat e armëve mund ta ndalojnë Hillary Clinton-in që të fitojë në zgjedhje, e, për rrjedhojë, që t’i zgjedhë gjykatësit e rinj të Gjykatës Supreme amerikane. Çka është përkthyer menjëherë nga media amerikane e më gjerë si një nxitje për vrasjen e kandidates demokrate.
Drejtuesit e fushatës së Trump-it kanë reaguar menjëherë, duke i quajtur të pandershme mjetet e informimit, e duke qartësuar se në fjalën e kandidadit republikan kërkohej të thuhej që mbrojtësit e të drejtave të armëve ishin një forcë e fuqishme votuese.
“Njerëzit e Amendamentit të Dytë kanë shpirt të jashtëzakonshëm dhe janë tejet të bashkuar, çka u jep atyre fuqi të madhe politike,” tha Jason Miller, një përfaqësues i fushatës së Trump-it.
Ndërkohë, nga kampi i Clinton-it u përgjigjën në këtë mënyrë: “Një person që kërkon të jetë president i Shteteve të Bashkuara nuk duhet të sugjerojë assesi dhunën.” /tesheshi.com/
