Presidenti amerikan ka mbërritur në Betlehem, në ndalesën e tij të tretë në turneun e parë jashtë vendit që prej marrjes së detyrës.
Donald Trump do të zhvillojë bisedime me Mahmoud Abbas-in, udhëheqësin palestinez, të cilin e pati pritur më herët gjatë këtij muaji dhe në Shtëpinë e Bardhë.
Rrugët për t’u dhënë hov edhe një herë përpjekjeve për paqe mes izraelitëve dhe palestinezëve do të jenë në qendër të bisedimeve mes Trump-it dhe Abbas-it.
Takimi me udhëheqësin palestinez vjen vetëm një ditë pasi presidenti amerikan u takua në Jerusalem me kryeministrin izraelit Benjamin Netanyahu.
Masa të rrepta sigurie janë marrë për vizitën e Trump-it në Betlehem, në Bregun Perëndimor, ndërsa në rrugë mund të shihen flamujt palestinezë dhe amerikanë, si dhe një banderolë e madhe ku shkruhet, “Qyteti i paqes mirëpret njeriun e paqes”.
Mahmoud Abbas ka deklaruar pak para vizitës së Trump-it se shpresonte që takimi mes tyre të ishte i frytshëm dhe i dobishëm.
Arabia Saudite ishte vendi i parë i vizituar nga Donald Trump në këtë udhëtim të tij. /tesheshi.com/
