Donald Trump do ta shpërfillte jo shumë kohë më parë aleancën ushtarake euroatlantike, duke e cilësuar atë si të dalë mode, si një organizëm të vjetruar.
Një opinion që ngjan të mos ketë zgjatur shumë te presidenti i ri amerikan, që ndryshe ka folur në takimin me sekretarin e përgjithshëm të NATO-s.
Në një konferencë të përbashkët për shtyp me Jens Stoltenberg-un pas pritjes në Shtëpinë e Bardhë, Trump ka thënë se kërcënimi i terrorizmit ka rivënë në pah rëndësinë e NATO-s. Për të, me fjalët e tij, NATO “nuk është më e dalë mode”.
Gjithnjë në kuadër të diskutimit për NATO-n, ai ka kërkuar që prej saj të bëhej më shumë për t’i ndihmuar partnerët afganë dhe irakianë.
Temë e fjalës së tij ka qenë dhe detyrimi i shteteve anëtare të NATO-s për t’ia kushtuar shpenzimeve ushtarake dy për qind të prodhimit të tyre të brendshëm bruto.
“Në përballjen me sfidat tona të përbashkëta, ne duhet të garantojmë që anëtarët e NATO-s të përmbushin detyrimet e tyre financiare dhe të paguajnë çka detyrohen,” deklaroi Trump. /tesheshi.com/
