Presidenti amerikan Donald Trump sugjeroi që kurdët e Sirisë të kthenin kokën kah ish-perandori francez i shekullit XIX, Napoleon Bonaparte, e të mos kërkonin mbrojtje nga SHBA-të.
“Kushdo që dëshiron të ndihmojë Sirinë në mbrojtjen e kurdëve është mirë me mua, pavarësisht a bëhet fjalë për Rusinë, Kinën ose Napoleon Bonapartën. Shpresoj që ata të gjithë t’ia dalin, ne jemi 7,000 milje larg!”, ka shkruar Trump në Twitter.
Ai mbrojti urdhrin e tij për tu tërhequr nga verilindja e Sirisë, duke thënë se misioni amerikan për të mposhtur ISIS-in në rajon ishte arritur “100 përqind”.
Presidenti shtoi që kreu i regjimit sirian, Bashar al-Asad, duhet të mbrojë rajonin.
“Le t’i mbrojnë kurdët Asadi dhe vendi i tyre, le ta luftojnë ata vet Turqinë. Unë u thashë gjeneralëve të mi, pse duhet të luftojmë për Sirinë dhe Asadin?”, ka shkruar Trump.
Turqia ka vendosur trupat në verilindje të Sirisë, pasi nisi një ofensivë ushtarake ndaj organizatave terroriste kurde javën e kaluar. Raportet flasin për më shumë se 300 të vdekur nga të dy palët dhe një krizë të re potenciale të emigrantëve. /tesheshi.com/
